Türkmenistanyň sowgady hökmünde Azerbaýjanda 500 orunlyk metjidiň gurluşygyna badalga berildi
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Azerbaýjan Respublikasyna iş saparynyň çäklerinde, Fizuli şäherinde metjidiň gurluşygyna dabaraly ýagdaýda badalga berildi. Bu metjit türkmenistanlylaryň azerbaýjan halkyna sowgady hökmünde gurlar.
Dabarada eden çykyşynda, Gahryman Arkadagymyz türkmen halkynyň arasynda ýollary, köprüleri we metjitleri gurmagyň mukaddes iş hasaplanýandygyny nygtady.
Dabaraly çärä sanly ulgam arkaly Türki Döwletleriň Guramasynyň XII sammitine gatnaşmak üçin Azerbaýjan Respublikasyna gelen wekiliýetleriň ähli ýolbaşçylary gatnaşdylar. Türkmenistanyň we Azerbaýjanyň müftüleriniň çykyşlaryndan soňra, Gahryman Arkadagymyz we Türki Döwletleriň Guramasynyň agza döwletleriň Baştutanlary ruhy ybadathananyň gurluşyk işlerine bir wagtda badalga berdiler.
Türkmen halkynyň Milli Lideriniň tabşyrmagy boýunça, metjidiň gurluşygyny «Aga-gurluşyk» atly hususy kärhana Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleri hasabyna amala aşyrar.
Beýik metjidiň guruljak ýeriniň meýdany bir gektardan gowrak bolup, onda bir wagtda 500 adam ybadat edip biler.
Prezident Ilham Aliýew Türkmenistan tarapyndan Azerbaýjana sowgat hökmünde metjidiň gurulýandygy üçin türkmen halkynyň Milli Lideri Gahryman Arkadagymyza, hormatly Prezidentimiz Serdar Berdimuhamedowa, şeýle hem ähli türkmen halkyna tüýs ýürekden hoşallyk bildirdi.
Türkmenistanyň Gurluşyk we binagärlik ministrligi
Министерство Строительства и архитектуры Туркменистана
Ministry of Construction and architecture of Turkmenistan